মৌলৰ পৰ্যাবৃত্ত শ্ৰেণীবিভাজন

Spread the love
Advertisement

 ইয়াত অসমীয়া মাধ্যমৰ, বিজ্ঞান বিষয়ৰ, প্ৰশ্নৰ উত্তৰ সমূহ দিয়া হৈছে ৷ দশম শ্ৰেণীৰ, অধ্যায়- ৫ মৌলৰ পৰ্যাবৃত্ত শ্ৰেণীবিভাজন (Periodic classification of elements) পাঠটিত থকা প্ৰশ্নৰ উত্তৰ সমূহ ইয়াত পাব ৷

প্ৰশ্নাৱলী, Page No- 81

1.নিউলেণ্ডছ অষ্টকৰ স্তম্ভবােৰত ড’বাৰেইনাৰৰ ট্রায়াড আছিলনে? তুলনা কৰা আৰু বিচাৰি উলিওৱা

উত্তৰ – হয়, নিউলেণ্ডছ অষ্টকৰ স্তম্ভবােৰত ড’বাৰেইনাৰৰ ট্রায়াড আছিল ৷ ড’বাৰেইনাৰৰ লিথিয়াম(Li) , ছ’ডিয়াম(Na) , আৰু পটেছিয়ামেৰে(K) গঠিত ট্ৰায়াডটো নিউলেণ্ডছ অষ্টকৰ এটা স্তম্ভত আছিল ৷

2. ড’বাৰেইনাৰৰ শ্ৰেণীবিভাজনৰ সীমাবদ্ধতাবােৰ কি কি আছিল ?

উত্তৰ – ড’বাৰেইনাৰৰ শ্ৰেণীবিভাজনৰ সীমাবদ্ধতাবােৰ তলত উল্লেখ কৰা হ’ল –

(i) ড’বাৰেইনাৰে সেইসময়লৈকে জ্ঞাত হোৱা মৌলবোৰৰ মাজৰ পৰা মাত্ৰ তিনিটা ট্ৰায়াডহে চিনাক্ত কৰিব পাৰিছিল ৷

(ii) পিছলৈ আবিস্কাৰ হোৱা মৌলবোৰক ট্ৰায়াড হিচাপে শ্ৰেণীভূক্ত কৰিব পৰাকৈ ড’বাৰেইনাৰৰ শ্ৰেণীবিভাজনৰ পদ্ধতিটো ব্যৱহাৰোপযোগী নাছিল ৷

3. নিউলেণ্ডছৰ অষ্টক সূত্ৰৰ সীমাবদ্ধতাবােৰ কি কি আছিল ?

উত্তৰ – নিউলেণ্ডছৰ অষ্টক সূত্ৰৰ সীমাবদ্ধতাবােৰ তলত উল্লেখ কৰা হ’ল –

(i) নিউলেণ্ডছৰ অষ্টক সূত্ৰ কেৱল কেলছিয়াম পৰ্যন্তহে হোৱা পোৱা গৈছিল ৷

(ii) নিউলেণ্ডছে প্ৰকৃতিত কেৱল 56 টা মৌল থকা বুলিহে জানিছিল ৷ পৰবৰ্ত্তী কালত আৱিস্কাৰ হোৱা মৌলবোৰৰ ধৰ্মবোৰ অষ্টক সূত্ৰৰ লগত খাপ খোৱা নাছিল ৷

(iii) নিউলেণ্ডছে তেঁওৰ তালিকা খনত মৌলবোৰ সজাওঁতে একেটা স্থানতে দুটাকে মৌলক স্থান দিছিল ৷ উদাহৰন – ক’বাল্ট(Co) আৰু নিকেলৰ(Ni) স্থান একেটা ৷

(iv) তেঁও তালিকাখনত ধৰ্মৰ মিল নথকা কিছুমান মৌলকো একেটা স্তম্ভতে স্থান দিছিল ৷ উদাহৰণ – ক’বাল্ট(Co) আৰু নিকেলৰ(Ni)ৰ ধৰ্ম বেলেগ হলেও ফ্ল’ৰিণ(F) , ক্ল’ৰিণ(Cl) , আৰু ব্ৰ’মিণৰ (Br) সৈতে একে স্তম্ভতে স্থান দিছিল ৷

(v) আইৰনৰ ধৰ্ম ক’বাল্ট(Co) আৰু নিকেলৰ(Ni)ৰ লগত মিলে যদিও ইয়াক এই মৌল কেইতাৰ পৰা আঁতৰত ঠাই দিয়া হৈছে ৷

মৌলৰ পৰ্যাবৃত্ত শ্ৰেণীবিভাজন- প্ৰশ্নাৱলী, Page No- 85

Advertisement

1.মেণ্ডেলিভৰ পৰ্য্যাবৃত্ত তালিকাখন ব্যৱহাৰ কৰি তলত দিয়া মৌলকেইটাৰ অক্সাইডৰ সংকেত নির্ণয় কৰা।-K, C, Al, Si, Ba.

উত্তৰ – Kৰ অক্সাইডৰ সংকেত হ’ব -K2O

C ৰ অক্সাইডৰ সংকেত হ’ব – CO2

Alৰ অক্সাইডৰ সংকেত হ’ব- Al2O3

Siৰ অক্সাইডৰ সংকেত হ’ব – SiO2

2. গেলিয়ামৰ উপৰিও আন কোনকেইটা মৌলৰ বাবে মৌলকেইটা আৱিষ্কাৰ হােৱাৰ পূর্বেই মেণ্ডেলিভে তেওঁৰ তালিকাত ঠাই ৰাখি থৈ গৈছিল? (যিকোনাে দুটা)

উত্তৰ – স্কেনডিয়াম (Sc) আৰু জাৰ্মেনিয়াম (Ge) |

3. মেণ্ডেলিভে তেওঁৰ পৰ্য্যাবৃত্ত তালিকাখন যুগুতাওঁতে মানি চলা নীতিবােৰ (criteria) কি কি আছিল ?

উত্তৰ – মেণ্ডেলিভে তেওঁৰ পৰ্য্যাবৃত্ত তালিকাখন যুগুতাওঁতে মানি চলা নীতিবােৰ তলত উল্লেখ কৰা হৈছে –

(i) মেণ্ডেলিভে মৌলসমূহৰ পাৰমানৱিক ভৰৰ সৈতে সিহঁতৰ ভৌতিক আৰু ৰাসায়নিক ধৰ্মৰ সম্পৰ্কে পৰীক্ষা কৰি চাইছিল ৷

(ii) ৰাসায়নিক ধৰ্মসমূহৰ ভিতৰত মৌলবোৰৰ অক্সিজেন আৰু হাইড্ৰ’জেনৰে সৈতে গঠন কৰা যোগবোৰৰ ওপৰত মেণ্ডিলিভে গুৰুত্ব দিছিল ৷

(iii) মৌল এটাক শ্ৰেণীভুক্ত কৰিবলৈ তেওঁ মৌলটোৱে গঠন কৰা হাইড্ৰাইড আৰু অক্সাইড সমূহৰ সংকেতক মৌলতোৰ অন্যতম মূল ধৰ্ম হিচাপে বিবেচনা কৰিছিল ৷

4. সম্ভ্ৰান্ত গেছবােৰক এটা সুকীয়া বৰ্গত কিয় স্থান দিয়া হৈছে ?

উত্তৰ – সম্ভ্ৰান্ত গেছবােৰ অতিশয় নিস্ক্ৰীয় আৰু আমাৰ বায়ুমণ্ডত এইবোৰ নিচেই কম মাত্ৰাত থাকে বাবে এইবোৰ আৱিস্কৃত হওঁতে বহু পলম হৈছিল ৷সেইবাবে সম্ভ্ৰান্ত গেছবােৰক এটা সুকীয়া বৰ্গত স্থান দিয়া হৈছে ৷

মৌলৰ পৰ্যাবৃত্ত শ্ৰেণীবিভাজন প্ৰশ্নাৱলী, Page No- 90

1. আধুনিক পৰ্য্যাবৃত্ত তালিকাই মেন্ডেলিভৰ পৰ্য্যাবৃত্ত তালিকাত থকা আঁসােৱাহবােৰ কি দৰে দূৰ কৰিছিল ?

উত্তৰ – আধুনিক পৰ্য্যাবৃত্ত তালিকাই মেন্ডেলিভৰ পৰ্য্যাবৃত্ত তালিকাত থকা আঁসােৱাহবােৰ তলত উল্লেখ কৰা ধৰণে দূৰ কৰিছিল –

(i) আধুনিক পৰ্য্যাবিত্ত তালিকাত মৌলৰ পাৰমানৱিক সংখ্যাক ভিত্তি হিচাপে লোৱা হৈছে৷ সেইবাবে মৌলবোৰক সজাওঁতে একেটা স্থানত দুটাকে মোলক স্থান দিব লগীয়া হোৱা নাই ৷

(ii) আধুনিক পৰ্য্যাবিত্ত তালিকাত হাইড্ৰ’জেনৰ স্থান নিৰূপন কৰা হৈছে ৷

(iii) আধুনিক পৰ্য্যাবিত্ত তালিকাত মৌলৰ সমস্থানিকবোৰক সিহঁতৰ মৌলৰ লগত একেলগে স্থান দিয়া হৈছে ৷

2. মেগনেছিয়ামৰ দৰে ৰাসায়নিক বিক্রিয়া দেখুৱাব বুলি ভবা দুটা মৌলৰ নাম লিখা। তােমাৰ এই বাচনিৰ ভিত্তি কি?

উত্তৰ – মেগনেছিয়ামৰ দৰে ৰাসায়নিক বিক্রিয়া দেখুৱাব বুলি ভবা দুটা মৌল হ’ল কেলছিয়াম(Ca) আৰু বেৰিয়াম(Ba) ৷ এই বাচনিৰ কাৰণ হ’ল তিনিওঁটা মৌলৰে যোজক ইলেকট্ৰনৰ সংখ্যা একে (২) ৷ ইহঁতৰ বৰ্গ এটাই (বৰ্গ – ২) ৷

3. নাম লিখা
(a) বহিৰতম কক্ষত এটাকৈ ইলেকট্রন থকা তিনিটা মৌলৰ।

উত্তৰ – লিথিয়াম(Li), ছডিয়াম(Na) আৰু পটেছিয়াম(K) ৷

(b) বহিৰতম কক্ষত দুটাকৈ ইলেকট্রন থকা দুটা মৌলৰ।

উত্তৰ – মেগনেছিয়াম (Mg) আৰু কেলছিয়াম(Ca) ৷

(c) পৰিপূৰ্ণ বহিৰতম কক্ষ থকা তিনিটা মৌলৰ

উত্তৰ – হিলিয়াম(He), নিয়ন(Ne) , আৰ্গন(Ar)

4.(a) লিথিয়াম, ছডিয়াম, পটেছিয়াম—এই আটাইকেইটা ধাতু । ইহঁতে পানীৰে সৈতে বিক্রিয়া কৰি হাইড্রজেন গেছ মুক্ত কৰে। এই মৌলকেইটাৰ পৰমাণুৰ কিবা সাদৃশ্য আছেনে?

উত্তৰ – লিথিয়াম, ছডিয়াম আৰু পটেছিয়ামৰ পৰমানুৰ সাদৃশ্য আছে –

(i) ইহঁতৰ যোজক ইলেকট্ৰনৰ সংখ্যা 1 ৷

(ii) ইহঁতক বৰ্গ একত স্থান দিয়া হৈছে ৷

(b) হিলিয়াম এটা নিষ্ক্রিয় গেছ আৰু নিয়ননা এটা প্রায় নিষ্ক্রিয় গেছ। ইহঁতৰ পৰমাণুবােৰৰ মাজত কি মিল থকা দেখা যায় ?

উত্তৰ – হিলিয়াম আৰু নিয়নৰ পৰমাণুৰ মাজত থকা মিলবোৰ তলত উল্লেখ কৰা হৈছে –

(i) ইহঁতৰ পৰিপূৰ্ণ বহিৰতম কক্ষ আছে ৷

(ii) ইহঁতক বৰ্গ 18ত স্থান দিয়া হৈছে ৷

5. আধুনিক পৰ্য্যাবৃত্ত তালিকাত থকা প্রথম দহােটা মৌলৰ ভিতৰত কোনকেইটা ধাতু?

উত্তৰ – আধুনিক পৰ্য্যাবৃত্ত তালিকাত থকা প্রথম দহােটা মৌলৰ ভিতৰত ধাতু – লিথিয়াম (Li) আৰু বেৰীলিয়াম(Be) ৷

6. পৰ্য্যাবৃত্ত তালিকাত স্থান বিবেচনা কৰি তলৰ মৌলকেইটাৰ কোনটো আটাইতকৈ বেছি ধাতৱধৰ্মী হ’ব বুলি অনুমান কৰিবা ?
Ga, Ge, As, Se, Be ৷

উত্তৰ – পৰ্য্যাবৃত্ত তালিকাত পৰ্যায় এটাত সোঁফালে ক্ৰমে ধাতৱীয় ধৰ্ম কমে আৰু বৰ্গ এটাত তললৈ ই বাঢ়ে ৷ সেয়েহে Ga, Ge, As, Se, Be মৌল কেইতাৰ ভিতৰত Be আটাইতকৈ বেছি ধাতৱধৰ্মী হ’ব ৷

দশম শ্ৰেণীৰ বিজ্ঞানৰ সহায়িকা মোবাইলত পাবলৈ আমাৰ মোবাইল এপ্ Download কৰক

মৌলৰ পৰ্যাবৃত্ত শ্ৰেণীবিভাজন- অনুশীলনী –

Advertisement

1. পর্যাবৃত্ত তালিকাৰ পৰ্যায়বোৰত বাঁওফালৰ পৰা সোঁফাললৈ যাওঁতে ঘটা পৰিৱৰ্তনৰ প্ৰকৃতিৰ ওপৰত আগবঢ়োৱা তলৰ উক্তি সমূহৰ কোনটো উক্তি শুদ্ধ নহয় ?

(a) মৌলবোৰ কম ধাতৱধৰ্মী হৈ পৰে।

(b) যোজক ইলেকট্রন সংখ্যা বাঢ়ে।

(c) পাৰমাণুবৰে সিহঁতৰ যোজক ইলেকট্রন অধিক সহজে হেৰুৱায়।

(d) অক্সাইডবোৰ বেছি আম্লিক হৈ পৰে।

উত্তৰ -(c) পাৰমাণুবৰে সিহঁতৰ যোজক ইলেকট্রন অধিক সহজে হেৰুৱায়।

2. মৌল X য়ে XCl2  সংকেতৰ ক্লৰাইড গঠন কৰে। ই উচ্চ গলনাংকযুক্ত এটা গোটা পদার্থ। মৌল X তলৰ কোনটোৰে সৈতে একেটা বৰ্গতে থকাৰ সম্ভাৱনা সবাতোকৈ বেছি?

(a) Na

(b) Mg

(c) Al

(d) Si

উত্তৰ – (b) Mg

3. কোনটো মৌলৰ আছে।

(a) ইলেকট্রনপূর্ণ দুটা কক্ষ?

(b) 2, 8, 2 ইলেকট্রনীয় বিন্যাস?

(C) যোজক কক্ষত চাৰিটা ইলেকট্রনৰে সৈতে মুঠ তিনিটা কক্ষ ?

(d) যোজক কক্ষত তিনিটা ইলেকট্রনৰে সৈতে মুঠ দুটা কক্ষ?

(e) দ্বিতীয় কক্ষত প্রথম কক্ষৰ দুগুণ ইলেকট্রন ?

উত্তৰ – (a) ইলেকট্রনপূর্ণ দুটা কক্ষ – নিয়ন (Ne)

             (b) 2, 8, 2 ইলেকট্রনীয় বিন্যাস – মেগনেছিয়াম (Mg)

             (c) যোজক কক্ষত চাৰিটা ইলেকট্রনৰে সৈতে মুঠ তিনিটা কক্ষ – চিলিকন(Si)

             (d) যোজক কক্ষত তিনিটা ইলেকট্রনৰে সৈতে মুঠ দুটা কক্ষ – বৰন (B)

             (e) দ্বিতীয় কক্ষত প্রথম কক্ষৰ দুগুণ ইলেকট্রন – কাৰ্বন (C)

4.a. পর্যাবৃত্ত তালিকাত ব’ৰনৰ সৈতে একেটা স্তম্ভতে থকা মৌলবােৰৰ কি কি সাধাৰণ ধর্ম আছে?

উত্তৰ – পর্যাবৃত্ত তালিকাত ব’ৰনৰ সৈতে একেটা স্তম্ভতে থকা মৌলবােৰৰ সাধাৰণ ধর্ম –

(i) সিহঁতৰ আটাইৰে যোজক ইলেকট্ৰনৰ সংখ্যা 3 বা যোজ্যতা 3 ৷

(ii) মৌলকেইটাক বৰ্গ 13ত স্থান দিয়া হৈছে ৷

(iii) ব’ৰনৰ বাহিৰে আন মৌল কেইটা অধাতু ৷

b. পর্যাবৃত্ত তালিকাত ফ্ল’ৰিনৰ সৈতে একেটা স্তম্ভতে থকা মৌলবােৰৰ কি কি সাধাৰণ ধর্ম আছে?

উত্তৰ -পর্যাবৃত্ত তালিকাত ফ্ল’ৰিনৰ সৈতে একেটা স্তম্ভতে থকা মৌলবােৰৰ সাধাৰণ ধর্ম –

(i) সিহঁতৰ আটাইৰে যোজ্যতা 1 ৷

(ii) মৌলকেইটাক বৰ্গ 17 স্থান দিয়া হৈছে ৷

(iii) আটাইকেইটা মৌল অধাতু ৷

5. এটা পৰমাণুৰ ইলেকট্রনীয় বিন্যাস হ’ল 2, 8, 7
a. এই মৌলটোৰ পাৰমাণৱিক সংখ্যা কি?

উত্তৰ – এই মৌলটোৰ পাৰমাণৱিক সংখ্যা 17 ৷

b. তলৰ মৌলবােৰৰ কোনটোৰে সৈতে ইয়াৰ ৰাসায়নিক সাদৃশ্য থাকিব? (বন্ধনীৰ ভিতৰত পাৰমাণবিক সংখ্যাবােৰ দিয়া হৈছে
N (7), F (9) ,P (15) ,Ar (18)

উত্তৰ – N(7) ৰ ইলেকট্ৰনীয় বিন্যাস – 2, 5

F(9)ৰ ইলেকট্ৰনীয় বিন্যাস – 2, 7

P(15)ৰ ইলেকট্ৰনীয় বিন্যাস – 2, 8, 5

Ar(18)ৰ ইলেকট্ৰনীয় বিন্যাস – 2, 8, 8

উক্ত মৌলটোৰ ৰাসায়নিক সাদৃশ্য F(9) ৰ সৈতে থাকিব কাৰণ দুয়োটা মৌলৰ যোজক ইলেকট্ৰনৰ সংখ্যা একে ৷

6. পর্যাবৃত্ত তালিকাত তিনিটা মৌল A, B আৰু C ৰ স্থানসমূহ তলত দেখুওৱা হৈছে।

16 বৰ্গ 17 বৰ্গ
—- —-
—- A
—– —-
B C

(a) মৌল A ধাতুনে অধাতু ?

উত্তৰ -মৌল A অধাতু ৷

(b) C মৌলটো A তকৈ বেছি সক্রিয়নে কম সক্রিয় ?

উত্তৰ -C মৌলটো A তকৈ কম সক্রিয় ৷

(c) C মৌলটো আকাৰত Bতকৈ ডাঙৰনে সৰু?

উত্তৰ -C মৌলটো আকাৰত Bতকৈ সৰু ৷

(d) মৌল A এ কেনে ধৰণৰ আয়ন, কেটায়ন বা এনায়ন গঠন কৰিব?

উত্তৰ -মৌল A এ এনায়ন গঠন কৰিব ৷

7. নাইট্রজেন (পাৰমাণৱিক সংখ্যা 7) আৰু ফছফৰাছ (পাৰমাণৱিক সংখ্যা 15) পৰ্য্যাবৃত্ত তালিকাৰ বৰ্গ 15 ত থাকে। এই মৌল দুটাৰ ইলেকট্রনীয় বিন্যাস লিখা। ইহঁতৰ কোনটো বেছি বিদ্যুৎঋণাত্মক হ’ব আৰু কিয় ?

উত্তৰ – নাইট্রজেনৰ ইলেকট্ৰনীয় বিন্যাস – 2, 5

ফছফৰাছৰ ইলেকট্ৰনীয় বিন্যাস – 2, 8, 5

ইহঁতৰ নাইট্রজেন বেছি বিদ্যুৎঋণাত্মক হ’ব কাৰণ বৰ্গ এটাত ইলেকট্ৰন গ্ৰহণ কৰা প্ৰৱণতা ক্ৰমে তললৈ কমে ৷

৪. পৰমাণু এটাৰ ইলেকট্রনীয় বিন্যাস আধুনিক পর্যাবৃত্ত তালিকাত তাৰ স্থানৰ সৈতে কিদৰে জড়িত হৈ আছে?

উত্তৰ – পৰমাণু এটাৰ ইলেকট্রনীয় বিন্যাসৰ দ্বাৰা আধুনিক পর্যাবৃত্ত তালিকাত তাৰ স্থান বিশ্লেষণ কৰিব পাৰি ৷ পৰমাণুটোৰ ইলেকট্রনীয় বিন্যাসত যোজক ইলেকট্ৰনৰ সংখ্যা আৰু কক্ষৰ সংখ্যাৰ পৰা ক্ৰমে বৰ্গ আৰু পৰ্যায়ৰ বিষয়ে গম পোৱা যায় ৷ উদাহৰণ স্বৰূপে, মেগনেছিয়ামৰ ইলেকট্রনীয় বিন্যাস 2, 8, 2 ৷ ইয়াত যোজক ইলেকট্ৰনৰ সংখ্যা 2 আৰু কক্ষৰ সংখ্যা 3 ৷ গতিকে পর্যাবৃত্ত তালিকাত মেগনেছিয়ামৰ স্থান বৰ্গ 2 আৰু পৰ্যায় 3ত |

9. আধুনিক পর্যাবৃত্ত তালিকাত কেলছিয়াম (পাৰমাণবিক সংখ্যা 20) 12, 19, 21 আৰু 38 পাৰমাণবিক সংখ্যা বিশিষ্ট মৌলকেইটাদ্বাৰা পৰিবেষ্টিত হৈ আছে। এইকেইটাৰ কাৰ কাৰ ভৌতিক আৰু ৰাসায়নিক ধর্মসমূহ কেলছিয়ামৰ সৈতে মিলে?

উত্তৰ – কেলছিয়ামৰ ইলেকট্ৰনীয় বিন্যাস – 2, 8 , 8, 2

আন মৌলকেইতাৰ ইলেকট্ৰনীয় বিন্যাস –

মৌলৰ পাৰমাণৱিক সংখ্যামৌলৰ ইলেকট্ৰনীয় বিন্যাস
12 2, 8, 2
19 2, 8, 8, 1
21 2, 8, 8, 3
38 2, 8, 18, 8, 2

দেখা গ’ল যে 12 আৰু 38পাৰমাণৱিক সংখ্যাযুক্ত মোল দুটাৰ যোজক ইলেকট্ৰনৰ সংখ্যা কেলছিয়ামৰ যোজক ইলেকট্ৰনৰ সংখ্যাৰ সমান ৷ সেয়েহে 12 আৰু 38পাৰমাণৱিক সংখ্যাযুক্ত মোল দুটাৰ ধৰ্ম কেলছিয়ামৰ সৈতে মিলে ৷

10. মেণ্ডেলিভৰ পর্যাবৃত্ত তালিকা আৰু আধুনিক পর্যাবৃত্ত তালিকাৰ মৌলৰ শ্রেণীবিভাজন (arrangement) ৰ তুলনা কৰা ৷

উত্তৰ – মেণ্ডেলিভৰ পর্যাবৃত্ত তালিকা আৰু আধুনিক পর্যাবৃত্ত তালিকাৰ মৌলৰ শ্রেণীবিভাজন পাৰ্থক্য সমূহ তলত উল্লেখ কৰা হ’ল –

মেণ্ডেলিভৰ পর্যাবৃত্ত তালিকাআধুনিক পর্যাবৃত্ত তালিকা
1. মেণ্ডেলিভৰ পর্যাবৃত্ত তালিকাত মৌলৰ পাৰমাণৱিক ভৰক ভিত্তি হিচাপে লোৱা হৈছিল ৷1.আধুনিক পর্যাবৃত্ত তালিকাত মৌলৰ পাৰমাণৱিক সংখ্যাক ভিত্তি হিচাপে লোৱা হৈছিল ৷
2. মেণ্ডেলিভৰ পর্যাবৃত্ত তালিকাত মুঠ ৮ টা বৰ্গ আছিল ৷2. আধুনিক পর্যাবৃত্ত তালিকাত মুঠ ১৮ টা বৰ্গ আছে ৷
3. মেণ্ডেলিভৰ পর্যাবৃত্ত তালিকাত হাইড্ৰ’জেনৰ স্থান নিশ্চিত হোৱা নাছিল ৷3. আধুনিক পর্যাবৃত্ত তালিকাত হাইড্ৰ’জেনক নিৰ্দিষ্ট স্থান দিয়া হৈছে ৷
4. মেণ্ডেলিভৰ পর্যাবৃত্ত তালিকাত সমস্থানিক সমূহক স্থান দিবলৈ সমস্যা হৈছিল ৷4. আধুনিক পর্যাবৃত্ত তালিকাত সমস্থানিক সমূহক সিহঁতৰ মৌলৰ লগত একেলগে স্থান দিয়া হৈছে ৷
5. মেণ্ডেলিভৰ পর্যাবৃত্ত তালিকা প্ৰস্তুত কৰা সময়ত সম্ভ্ৰান্ত গেছ সমূহ আৱিস্কাৰ হোৱা নাচিল ৷ কিন্তু আৱিস্কাৰ হোৱাত এটা নতুন বৰ্গত সংস্থাপন কৰা হৈছিল ৷5.আধুনিক পর্যাবৃত্ত তালিকাত সম্ভ্ৰান্ত গেছ সমূহক এটা সূকীয়া বৰ্গত স্থান দিয়া হৈছে ৷

দশম শ্ৰেণীৰ বিজ্ঞানৰ সহায়িকা মোবাইলত পাবলৈ আমাৰ মোবাইল এপ্ Download কৰক

NCERT সমাধান – বিজ্ঞান – দশম শ্ৰেণী

 অধ্যায় ১- ৰাসায়নিক বিক্ৰিয়া আৰু সমীকৰণ

অধ্যায় ২- এছিড, ক্ষাৰক আৰু লৱণ

অধ্যায়- ৩ ধাতু আৰু অধাতু

অধ্যায়- ৪ কাৰ্বন আৰু তাৰ যৌগ

অধ্যায় ৫ -মৌলৰ পৰ্যাবৃত্ত শ্ৰেণীবিভাজন

অধ্যায় ৬ – জীৱন প্ৰক্ৰীয়া

অধ্যায় ৭- নিয়ন্ত্ৰণ আৰু সমন্বয়

অধ্যায় ৮ – জীৱই কেনেকৈ বংশবিস্তাৰ কৰে

অধ্যায় -৯ বংশগতি আৰু ক্ৰমবিকাশ

অধ্যায়-১০ পোহৰ- প্ৰতিফলন আৰু প্ৰতিসৰণ

অধ্যায় ১১- মানুহৰ চকু আৰু বাৰেবৰণীয়া পৃথিৱী

অধ্যায় ১২ – বিদ্যুৎ

অধ্যায়-১৩ বিদ্যুৎ- প্ৰবাহৰ চুম্বকীয় ক্ৰিয়া

অধ্যায়- ১৪ শক্তিৰ উৎসসমূহ

অধ্যায়- ১৫ আমাৰ পৰিবেশ

অধ্যায়- ১৬ প্ৰাকৃতিক সম্পদৰ ব্যৱস্থাপনা

For Current Affairs, Please click here….

আমাক facebook ত follow কৰিবলৈ ইয়াত click কৰক…!

ধন্যবাদ …!!!

15 Replies to “মৌলৰ পৰ্যাবৃত্ত শ্ৰেণীবিভাজন”

Leave a Reply

Your email address will not be published. Required fields are marked *